ЯҢАЛЫКЛАР
Түбән Шытсу авыл җирлегендә агач утырту буенча әзерлек эшләре алып барыла. Эшне Лесхоз урман хуҗылыгы башкара. Барлыгы 10га җирдә нарат, чыршы агачлары утыртылачак.
Түбән Шытсу төп мәктәбе укучылары "Дулкын" радиосында "Мәктәпләр тормышыннан" радиотапшыруында катнашты. Алар мәктәп яңалыклары белән таныштырдылар, музыкаль чыгышларын тәкъдим иттеләр.
11 май көнне Югары Шытсу мәдәният йортында "Гаилә - ил терәге" бәйгесенең җирлек этабы булып узды. Әлеге бәйгедә Югары Шытсу авылыннан Мәүлетовлар, Хидиятуллинар, Түбән Шытсу авылыннан Шакировлар һәм Фаляхутдиновлар гаиләсе катнашты. Бәйге өч турдан торды. Беренче турда гаиләләр үзләре белән таныштырды, икенче турда әтиләр бала төрү ярышында көч сынаштылар, әни кешеләр исә токмач кисүдә осталыкларын күрсәттеләр. Өченче турда гаиләләр тарафыннан иҗади чыгышлар тәкъдим ителде. Бәйге нәтиҗәләрен жюри әгъзалары түбәндәгечә игълан итте: Фаляхутдиновалар иң сөйкемле гаилә, Шакировалар иң тәвәккәл, Мәүлетовлар иң иҗади һәм Хидиятуллиннар иң сәләтле гаилә буларак танылды. Барлык җиңүчеләргә акчалата бүләкләр тапшырылды.
Түбән Шытсу авыл җирлеге Җиңүнең 79 еллыгына багышланган Саба муниципаль районының Җиңү парадында УАЗ автомашинасы белән катнашты.
8 май көнне Түбән Шытсу авылында Җиңү бәйрәме уңаеннан концерт-митинг булып узды. Концерттан соң һәйкәл янында чәчәк кую һәм агач утырту башкарылды.
Түбән Шытсу авылында "Авыл биләмәләрен комплекслы үстерү" дәүләт программасы нигезендә ике йорт төзелеше башланып китте. Әлеге эшне "ПМК-159" ҖЧҖ оешмасы башкара.
Югары Шытсу мәдәният йорты хезмәткәрләре, укучы балалар белән берлектә, "Җиңү тәрәзәсе" акциясенә кушылдылар.
Югары Шытсу мәдәният йорты, китапханә хезмәткәрләре авыл хуҗалыгы хезмәтчәннәрен яз һәм хезмәт бәйрәме белән котладылар. Алар бергәләп җырладылар, биеделәр һәм шуның нигезендә күтәренке кәеф, көчле энергия бүләк иттеләр!
Елыш авыл зиратында авыл халкы, кайткан кунаклар катнашында зиратта өмә булып узды. Корыган агачлар, куаклар киселде.
Җиңү бәйрәме якынлашкан көннәрдә Түбән Шытсу төп мәктәбе укучылары, сугыш ветераннарының каберлекләренә георгий тасмасын бәйләп чыктылар.